सीएम-ई-वृत्तसेवा

विधिमंडळाचे हिवाळी अधिवेशन संस्थगित

पुढील अर्थसंकल्पीय अधिवेशन 11 मार्च 2013 पासून

नागपूर दि. 21 :  10 डिसेंबर 2012 रोजी नागपूर येथे सुरु झालेले विधिमंडळाचे हिवाळी अधिवेशन संस्थगित झाले असून पुढील अर्थसंकल्पीय अधिवेशन मुंबई येथे 11 मार्च 2013 रोजी होणार असल्याचे विधानपरिषदेत सभापती शिवाजीराव देशमुख यांनी सांगितले तर विधानसभेत अध्यक्ष दिलीप वळसे-पाटील यांनी आज सांगितले.

विधानसभेच्या झालेल्या कामकाजाची माहिती देताना विधानसभा अध्यक्ष दिलीप वळसे पाटील म्हणाले,  विधानसभेचे कामकाज रोज 6 तास याप्रमाणे 60 तास होणे आवश्यक असून प्रत्यक्ष कामकाज 65 तास झाले रोज सरासरी 6.30 तास याप्रमाणे काम झाले. दोन दिवसात 7 विभागाच्या पुरवण्या मागण्या मांडण्यात आल्या. या चर्चेत 54 सदस्यांनी भाग घेतला. विधानसभेत 7 आणि विधानपरिषदेत 3 अशी एकूण 10 विधेयके संमत झाली. तारांकीत प्रश्नांची संख्या 9162 एवढी असून त्यापैकी 768 प्रश्न स्वीकृत करण्यात आले. त्यापैकी 28 प्रश्नांवर चर्चा झाली. प्राप्त लक्षवेधींची संख्या  2398 एवढी असून यापैकी  131 लक्षवेधी स्वीकृत करण्यात आल्या त्यापैकी 16 लक्षवेधींवर सभागृहात चर्चा करण्यात आली.  सदस्यांची एकूण उपस्थिती 88.80 टक्के एवढी होती. जास्तीत जास्त उपस्थिती 90.36 टक्के तर कमीत कमी उपस्थिती 41.44 टक्के एवढी होती.

 राष्ट्रगीताने हिवाळी अधिवेशनाची सांगता झाली. यावेळी सभागृहात मुख्यमंत्री, उपमुख्यमंत्री, राज्यमंत्री तसेच विधिमंडळ सदस्य उपस्थित होते.

000000