दुष्काळ निवारणासाठी निधीची
कमतरता पडू देणार नाही -मुख्यमंत्री
नागपूर दि.21 : दुष्काळी
परिस्थितीचा सामना करण्यासाठी शासन कटीबध्द असून यासाठी शासन निधीची कमतरता पडू देणार नसल्याची ग्वाही
मुख्यमंत्री पृथ्वीराज चव्हाण यांनी आज विधानसभेत दिली.
विधानसभा
सदस्य श्री शशिकांत शिंदे यांनी महाराष्ट्र विधानसभा नियम 293 अन्वये मांडलेल्या
प्रस्तावाला उत्तर देतांना मुख्यमंत्री बोलत होते.
श्री
चव्हाण म्हणाले, दुष्काळ निवारणासाठी आतापर्यंत 900 कोटीवर खर्च झाला असून हा खर्च
2000 कोटीपर्यंत जाण्याची शक्यता आहे. याचे योग्यप्रकारे शासन नियोजन करीत आहे. दुष्काळी
भागात चारा, पाणी इत्यादी बाबींसाठी निधी उपलब्ध करुन देण्यात येत असल्याचेही मुख्यमंत्र्यांनी
यावेळी सांगितले.
मराठवाडयातील पाणी टंचाईविषयी बोलताना
मुख्यमंत्री म्हणाले की, मराठवाडयात केवळ 19 टक्के पाणी साठा उपलब्ध आहे. जायकवाडी
धरणात 3 टक्के तर उजनी धरणात केवळ 7 टक्के पाणी साठा उपलब्ध आहे. पुढील जुन
महिन्यापर्यंतचा विचार करता काही दिवसापुर्वी जायकवाडी धरणात 9 टीएमसी पाणी
सोडण्यात आले होते. पिण्याच्या पाण्याला प्राधान्य देण्यात येणार असल्याने यापुढे
परळी औष्णिक वीज निर्मिती केंद्राला पाणी देता येणार नसल्याचेही मुख्यमंत्र्यांनी
यावेळी सांगितले.
मुख्यमंत्री
पुढे म्हणाले, उस्मानाबाद आणि जालना
जिल्ह्यातील पाणी पुरवठा योजनासाठी अनुक्रमे 51 कोटी, 22 कोटी रुपयांचा
निधी देण्यात येणार आहे. एका वर्षात पुर्ण होणाऱ्या जलसिंचन प्रकल्पांसाठी केंद्र
सरकारकडे 2200 कोटी रुपयांचे प्रस्ताव पाठविण्यात आले आहेत. मराठवाडयात मनरेगाअंतर्गत
1 लाखापेक्षा अधिक लोकांना रोजगार मिळाला आहे. फेब्रुवारी नंतर ऊस कारखाने बंद
झाल्यावर निर्माण होणारा ऊस मजुरांचा रोजगाराचा प्रश्न पाहता या मजुरांना रोजगार
हमी योजनेच्या कामांमध्ये सामावून घेणार असल्याची माहिती मुख्यमंत्र्यांनी
दिली.
दुष्काळग्रस्त
भागातील प्रादेशिक पाणी पुरवठा योजनेविषयी बोलतांना मुख्यमंत्री म्हणाले की,
ग्रामीण भागातील या योजनेची वीज खंडीत केली जाणार नाही. नागपूर, औरंगाबाद आणि पुणे
आयुक्तांना आपापल्या विभागातील पाण्याचा स्त्रोत टँकरची उपलब्धता याविषयी आराखडा
तयार करण्याच्या सूचना दिल्याचेही मुख्यमंत्र्यांनी यावेळी सांगितले.
या प्रस्तावाच्या चर्चेत सर्वश्री शशिकांत
शिंदे, प्रशांत ठाकूर, कालिदास कोळंबकर, डॉ. नामदेव उसेंडी, मधु चव्हाण , ॲड. अशोक
पवार, कृषिभूषण साहेबराव पाटील, जयकुमार गोरे, शिरीष कोतवाल, बबनराव शिंदे, भारत
भालके, सिताराम घनदाट, ॲङ सदाशिवराव पाटील, श्री. सुरेश जेथलिया, डॉ. अनिल बोंडे
आदी सदस्यांनी भाग घेतला.
कोणत्याही टिप्पण्‍या नाहीत:
टिप्पणी पोस्ट करा