संकटातून सावरत नेहमीपेक्षा
अधिक जोमाने कामाला लागुया
मुख्यमंत्र्यांचे आवाहन
मुंबई,
दिनांक 25 जून : मंत्रालय ही केवळ राज्याचा गाडा हाकणारी एक इमारत नाही, तर
सगळ्या देशाचे नेतृत्व करणाऱ्या
महाराष्ट्राचे शक्ती केंद्र आणि राज्याचा स्वाभिमान आहे. आणि हे केंद्र
ज्या मुंबईत आहे त्या महानगराचा जगात एक लौकिक आहे. मुंबईवर एक ओरखडा जरी निघाला
तर देशात काय, जगात त्याची प्रतिक्रिया उमटते आणि म्हणूनच इतर कुठल्याही संकटातून जसे आपण
सावरून कामाला सुरुवात करतो, तशीच सुरुवात करून आपल्याला नेहमीपेक्षा अधिक जोराने
कामाला लागूया,
असे आवाहन मुख्यमंत्री पृथ्वीराज चव्हाण यांनी
मंत्रालयातील अधिकारी आणि कर्मचारी वर्गाला केले आहे.
चार दिवसांपुर्वी आपल्या राज्याचा मानबिंदु असलेल्या या मंत्रालयाच्या पवित्र
इमारतीतील अग्नीतांडव बहुतेकांनी पाहिले आणि काहीजणांनी अनुभवलेही आहे. दिनांक २१ जूनच्या
भयंकर अशा आगीच्या घटनेनंतर स्वत:ला सावरत सर्व अधिकारी व कर्मचारी पुन्हा एकदा
जोमाने कामावर हजर होत आहेत, ही प्रबळ इच्छा केवळ कौतुकास्पद नाही तर नेतृत्वगुण
दाखविणारी आहे, असे सांगून श्री.चव्हाण
यांनी या
दुर्घटनेत ५ जणांनी जीव गमावले आहेत, त्यांनाही श्रद्धांजली वाहिली.
परिस्थिती पूर्वपदावर
आगीची भीषण घटना घडून गेल्याला आज ४ दिवस पूर्ण होत आहेत. कशामुळे आग लागली, ती इतकी वेगाने कशी पसरली, त्याला
कोण जबाबदार आहे, या प्रश्नांची उत्तरे मिळतीलच. तो एक वेगळा भाग आहे, असे सांगून मुख्यमंत्री पुढे म्हणाले की, आगीवर नियंत्रण मिळविल्यानंतर दिवस रात्र ज्या झपाट्याने आपण परिस्थिती
पूर्वपदाला आणली आहे, त्या प्रयत्नांना सगळे जग दाद देत आहे.
मुंबईने यापूर्वी अनेक मानव निर्मित आणि नैसर्गिक संकटाचा सामना केला आहे. या
संकटातूनदेखील निर्धाराने मार्ग काढायचा आहे. ज्या दिवशी ही आग लागली त्यादिवशी
फायर ब्रिगेड, पोलीस यांच्या जोडीने मंत्रालयातले अगदी चतुर्थ श्रेणी कर्मचारी
सुध्दा मदत कामात धावपळ करीत होते. इमारतीवरचा तिरंगा व्यवस्थित उतरविण्याचे भान
या कर्मचाऱ्यांनी ठेवले, जखमीना रुग्णालयात पोहचविण्याचे काम देखील केले. आपत्ती
आल्यानंतर स्वत:ची सुटका करताना सहकाऱ्यांना देखील मदत केली आहे.
सुरक्षिततेचे निकष पाळायलाच हवेत
ही घटना आपल्याला बरेच काही शिकवून जाणारी आहे. मंत्रालयाची ही इमारत बरीच
जुनी असली तरी तिचे मूळ बांधकाम मजबूत आहे. मात्र वरचेवर या ठिकाणी कामाच्या
गरजेप्रमाणे आपण अंतर्गत बदल करीत गेलो, हे करताना काळजी घेणे, महत्वाच्या
गोष्टींकडे लक्ष देणे आवश्यक होते, असे सांगून श्री.चव्हाण पुढे म्हणाले की, आपत्तीत
अधिक जबाबदारीने आणि समयसूचकतेने वागणे आवश्यक आहे. यापुढच्या काळात आकस्मिक
संकटांच्यादृष्टीने सुरक्षिततेचे सर्व निकष पाळुन, नियमांचे उल्लंघन होणार नाही
याची काटेकोर काळजी घेणे आवश्यक आहे.
नष्ट झालेल्या
अभिलेखांचे पुनर्गठण
सर्वात पहिली महत्वाची गोष्ट म्हणजे फाईल्स आणि डाटा रिकव्हरी. नष्ट झालेल्या
अभिलेखांचे पुनर्गठण करण्याबरोबरच सर्वसामान्य जनतेचे टपाल स्वीकारणे, स्थलांतरित
कराव्या लागणाऱ्या विभागांची वा कक्षांची
माहिती संबंधितांना मिळेल याची
व्यवस्था करणे, ही कामे प्राधान्याने करावी लागणार आहेत.
मंत्रालयातील
जो भाग सुस्थितीत आहे विशेषत: विस्तारित इमारत, सी-3 (मुख्य) आणि 4 मुख्य भाग या ठिकाणी
जमिनीवरील पाणी काढणे, कचरा हटविणे, वीज पुरवठा सुरळीत करणे, फलक लावणे, खिडक्यांची तावदाने लावणे, जी कार्यालये इतरत्र स्थलांतरित झाली आहेत,
त्या कार्यालयांचे टपाल मंत्रालयात स्वीकारण्याची व्यवस्था करणे अशी विविध कामे
करायची आहेत.
प्रत्येक जिल्हाधिकारी कार्यालयात विशेष सेल
राज्यातील प्रत्येक जिल्हाधिकारी कार्यालयात विशेष सेल तयार करण्यात येणार
आहे. जनतेशी संबंधीत असलेल्या व आगीत नष्ट झालेल्या कागदपत्रांसंदर्भात तातडीने
विशेष सेल तयार करण्याचे आदेश मी यापूर्वीच दिले असून आगीत नुकसान झाल्याने जी
कार्यालये स्थलांतरित करावी लागणार आहेत, त्यांच्याबाबतही फर्निचर व माहिती
तंत्रज्ञान उपकरणे बसविणे, यापासून अभ्यागतांच्या प्रवेशाची व्यवस्था करणे आपल्या
विभागाचे संपर्क कार्यालय जे.जे. गेट येथील शेडमध्ये पूर्ण क्षमतेने सुरु करणे
आवश्यक आहे.
आगीचे काम दाखवून काम थांबणार नाही
काही विभागांचे संपर्क कक्ष कालपासून सुरु झाले आहेत. या संपर्क कक्षात
क्षेत्रिय कार्यालय तसेच टपाल स्वीकारून अभ्यागतांना आवश्यक ती माहिती द्यावी
लागणार आहे. कुठल्याही परिस्थितीत सर्वसामान्य नागरिकांचे काम अडणार नाही, प्रशासन
थांबणार नाही,आगीचे कारण दाखवून काम थांबणार नाही याची प्रत्येकाने दक्षता घ्यावी,
असे सांगून मुख्यमंत्री पुढे म्हणाले की, कार्यक्षमतेची खरी परीक्षा संकटकाळीच
होते. एका संकटावर थोडीशी का होईना, पण मात करुन आपण आज एक नवी सुरुवात करीत आहोत.
या ठिकाणी कविवर्य कुसुमाग्रज यांच्या एका काव्यपंक्तीची आठवण येते.....कविवर्य
म्हणतात,
अनंत अमुची
ध्येयासक्ती, अनंत अन् आशा....
किनारा तुला पामराला..
या संकटालाही आपण असेच म्हणुया.
आमची जिद्द, आमचा
आत्मविश्वास दुर्दम्य आहे, एखाद्या संकटामुळे तो कोलमडुन पडणारा नाही. हा
महाराष्ट्र छत्रपती शिवरायांचा, फुले-शाहु-आंबेडकर या प्रात:स्मरणीय त्रयीचा आहे.
पूर्व दिव्य ज्यांचे त्यांना रम्य भावी काल,
रात्रीच्या गर्भात वसे उद्याचा उष:काल ......
या दुर्घटनेमुळे
कामकाजावर, प्रशासनावर कोणताही परिणाम होणार नाही, याची आपण
सर्वांनी पराकोटीची दक्षता घेऊया. लोकल्याणकारी राज्य म्हणजे काय असते,
याचे अत्यंत उत्तम असे उदाहरण घालुन देण्याचे काम करूया, असे स्पष्ट करून मुख्यमंत्री पुढे म्हणाले की, महाराष्ट्राचे भाग्यविधाते प्रथम मुख्यमंत्री
स्व. यशंवतरावजी चव्हाण यांच्या जन्मशताब्दी वर्षात ही महाभयंकर दुर्घटना घडली, हे
दुर्दैवाचे आहे. म्हणुनच या संकटावर मात करुन यापुढच्या काळात नव्या जोमाने,
एकदिलाने आणि राष्ट्रभावनेने प्रेरित होऊन आपण सगळे पुढे जाऊया आणि एक नवा
महाराष्ट्र घडवुया असेही मुख्यमंत्र्यांनी शेवटी म्हटले आहे.
00000
.JPG)
